Nangisayangkaten ti nationwide manhunt iti Philippine National Police (PNP) kontra kenni Sen. Ronald “Bato” dela Rosa mainaig iti warrant of arrest nga inruar ti International Criminal Court (ICC).
Segun kenni PNP chief Gen. Jose Melencio Nartatez Jr., naiwarasen dagiti tracker teams kalpasan a pinalubosan ti Department of Justice (DOJ) iti pannakaipatungpal ti panag-aresto. Binilin na met dagiti pulis nga ipangruna iti maximum tolerance ken sumurot iti umno a proseso iti operasyon.
No maaresto ni Dela Rosa, dagus a maipasidong daytoy iti kustodiya ti DOJ. Saan pay met nga inbaga ti ahensia no dagus a maiturong isuna idiay The Hague, Netherlands, a pakasarakan iti detention facility ti ICC.
Pinasingkedan met ti Criminal Investigation and Detection Group (CIDG) nga iggemdan iti kopya ti ICC arrest warrant ken impaganetget nga adda pay laeng ditoy Pilipinas ni Dela Rosa, iti laksid dagiti report a maipagarup a nasaripatpatan isuna idiay Malaysia.
Nagballaag iti pulisya a mabalin a makasuan ti obstruction of justice iti asinoman a manglapped wenno tumulong iti panaglibas ti senador. Malaksid iti PNP, nangaramid met ti bukod nga operasyon ti National Bureau of Investigation (NBI) tapno sapulen ni Dela Rosa.
Kabayatanna, pinaglibakan ni Sen. Robinhood Padilla a tinulonganna a makalibas ni Dela Rosa manipud iti Senado. Kinunana a awan ti naipakita a warrant manipud iti lokal a korte iti dayta nga oras ken saan na nga ibilang a “fugitive” iti senador.
Kinuna met ni sigud a PNP chief Nicholas Torre III nga obligasyon dagiti pulis nga ipatungpal iti aniaman a legal warrant nga awan ti mapilpili.###
