Pinapigsa ken iningetan ti Philippine National Police (PNP) iti koordinasionda kadagiti dadduma nga ahensia tapno mapapartak iti panangtakuat ti agdama a lokasion ti pugante a ni Cassandra Ong, a karaman iti ilegal nga operasion ti Lucky South 99.
Segun kenni Acting PNP Chief Police Lieutenant General Jose Melencio Nartatez Jr., panggep daytoy a papigsaen dagiti tignay kontra iti ilegal nga operasion ti Philippine Offshore Gaming Operations (POGO) tapno masigurado a mapagsungbat dagiti personalidad nga adda ti likudan dagiti ilegal nga aktibidad.
Malaksid kadagiti lokal nga ahensia, pinatibker met ti PNP iti koordinasioda kadagiti foreign counterparts para iti tracking dagiti nagbalin a biahe ni Ong iti ballasiw-taaw ken tapno dagus a maisubli ti nasao a pugante ditoy Pilipinas para iti pannakaarestona.
Maibasar kadagiti kauddian a report a naawat ti National Police, naudi a nakita ni Ong idiay Japan kalpasan a nawayawayaan manipud iti panaka-detinena.
Inngato metten ti PNP iti impormasion iti International Criminal Police Organization (Interpol) kasaruno ti nairuar a red notice kontra kenni Ong.
Impasigurado ti pulisya a pagsungbaten da dagiti personalidad nga adda iti likudan ti human trafficking violations ken sanguen dagiti maiyannatup a kaso ken responsibilidad.#
