Impalgak ti liderato ti Presidential Anti-Organized Crime Commission ti posible a pangakar dagiti POGO hubs idiay Visayas ken Mindanao.
Segun kenni Presidential Anti-Organized Crime Commission (PAOCC) executive director Gilbert Cruz, agtultuloy ti panangmonitorda iti nadakamat nga aktibidad kalpasan ti naawat a report.
Agingga 80% paylaeng iti dagup a 400 POGO hubs a banbantayan da ti naan-anay a naipaserra.
Inlawlawag pay ti opisyal a saan nga agpatingga ditoy ti operasyon da, imbes ketdi, ipamaysa da pay dagiti babassit nga POGO kadagiti nagduduma a paset ti pagilian, nangruna iti Metro Manila.
Immuna nga imbilin ti PBMM babaen ti pannakaipaulog ti executive order ti total ban ti operasion ti Philippine Offshore Gaming, internet gaming, ken dadduma pay nga offshore gaming operations ditoy Pilipinas.
Dumanon iti 22k foreign POGO workers ti naipadeport manipud iti target a 33k POGO workers bayat a sapsapulen pay laeng ti Bureau of Immigration dagiti nabati a 11k foreign workers a saan pay a nagsurrender kadagiti otoridad ken mapapati a nagwarasen a nagdudulin ditoy intero a pagilian.
