Inkangrunaan ni Pope Francis idi Domingo dagiti biktima ti mpox virus kadagiti linawas a kararagna ken inawaganna dagiti gobierno ken pharmaceutical industry nga iyad-adu pay iti maipatulod bakuna kadagiti pagilian a kakarwan a natirwan ti sakit.
Indeklara ti World Health Organization ita a bulan ti panagadu dagiti kaso ti mpox manipud Democratic Republic of Congo kadagiti dadduma a nasion ti Africa a global health emergency.
Inawaganna pay ti dakdakkel a produksion ken panagbibinninglay kadagiti bakuna.
Bayat a pinulpullo a tawenen a pagaammo ti mpox, ti baro nga ad-adda a makapapatay ken naparpartak a makaiyakar a strain ti Clade 1b — iti nangtignay iti nabiit pay nga iyaadu dagiti kaso.
Ti clade 1b ti pakaigapuan ti ipapatay iti agarup 3.6% kadagiti kaso, nga ad-adda a nagpeggad kadagiti ubbing.
Nagsaknap ti virus iti intero a Democratic Republic of Congo, a nakatayan ti nasurok a 570 a tattao agingga ita a tawen.
Naipadamag ti panagraira ti sakit idiay Burundi, Kenya, Rwanda ken Uganda sipud pay idi Hulio ken ti immuna a kaso idiay Europa ket naipadamag idiay Sweden idi napan a lawas.
