BR LA UNION – Tinungpal ti Vatican ti maudi a bilin ni Pope Francis sakbay a pimmusay nga ited idiay Gaza ti Pope Mobile na.
Ti nasao a lugan ket napartuat a mobile health unit para iti sumagmamano a ribo nga ubbing idiay Gaza a naapektaran ti giyera.
Segun iti Vatican, kiniddaw ti Santo Papa iti naudi a bulan idi sibibiag pay, nga ited iti Caritas Jerusalem ti nasao a mobile.
Masansan a dakamaten idi ti Santo Papa a dagiti ubbing iti rupa, nagan, ken istorya kadagiti nakaam-ames a pasamak idiay Gaza.
Nakabilan ti nasao a mobile iti arwaten para iti diagnosis, examination ken treatment kas ti rapid test para iti infections, diagnostic instruments, bakuna, suture kits ken sumagmamano a life-saving supplies.
Adda pay nadutokan a doctors ken medics nga agturong kadagiti nasulinek a lugar idiay Gaza apaman a maisubli iti humanitarian access idiay Gaza.
