Nakadepende iti desisyon ni Presidente Ferdinand Marcos Jr. ti possible a panangipatulod ti Philippine warships idiay West Philippine Sea.
Daitoy ti nagbalin a sungbat ni Philippine Coast Guard (PCG) spokesperson for the West Philippine Sea Commodore Jay Tarriela ti maysa nga interview kasaruno ti kabaruan nga insidente idiay WPS ita nga lawas.
Naka-engkwentro ti barko ti PCG a BRP Teresa Magbanua ti napeggad a maniobra, panagharang, ken panangsurot wenno panang-ipos ti warship ti People’s Liberation Army Navy asideg idiay Bajo de Masinloc idi Disyembre 4.
Segun kenni Commodore Tarriela, daitoy ti umuna a daras a nakibiyang ken napaset ti warship ti PLA Navy iti panangharrass ti barko ti PCG.
Inlawlawag met ti PCG official a ti Armed Forces of the Philippines (AFP) ti adda otoridad na a kumiddaw ti policy recommendation iti Presidente kas commander-in-chief maipapan ti nasao a saritaan.
Pinasingkedan ni Commodore Tarriela nga agpatpatrolya dagiti warships ti Pilipinas idiay WPS.
Agtultuloy pay a nakabantay ti Philippine Navy ken AFP ti amin a sitwasyon idiay WPS ngem saan da a makibibyang kadagiti harassments dagiti nagkakadakkel a barko ti China.
Kinuna ti opisyal a saan a kabaelan a sukatan ti PCG ti Philippine Navy maipapan ti panagdepensa kadagiti teritoryo ti pagilian agsipud ta ti mandato ti Coast Guard ket tumulong laeng kadagiti maisaysayangkat a misyon.
Kabayatanna, suportado met ti PCG ti aniaman nga agbalin a desisyon ti Presidente ken ti Hukbong Sandatahan ng Pilipinas.
