Inlawlawag ti Philippine Ports Authority (PPA) a saan a konektado dagiti staff-da kadagiti dua a ‘fixers’ a natiliwan idi nabiit idiay Batangas Port.
Segun iti PPA, nainget a kondenarenda dagiti fixers a mangparigat iti panagbiahe dagiti pasahero iti destinasionda.
Idi Disiembre 23, natiliwan ti dua nga indibidual babaen ti joint entrapment operation ti Philippine National Police Maritime Group, PPA Port Police, ken Philippine Coast Guard-Batangas a mangitukon kadagiti pasahero a mapapartak ti panagbiaheda kasukat ti sumagmamano a ribu a pisos.
Segun kenni PPA General Manager Jay Santiago, agserbi daitoy kas maysa a pakdaar kadagiti mangpadas nga agaramid ti ilegal nga aktibidad kadagiti pantalan.
Iti biang ti PPA, immun-una nga inyakarda ti entrance gate iti Batangas Port tapno maliklikan dagiti mangidiaydiaya ti insurance iti ruar ti sangladan.
Ngem gapu ta holiday rush, ginundawayan dagiti scammers ken dagiti mayat a mangsingir dagiti pasahero iti triple ti babaydan da.
Iti agdama, agtultuloy ti imbestigasion iti nasao nga insidente ken ilawlawag ti Asian Terminals Incorporated a mapapati a karaman wenno makiramraman dagiti guardiada iti nasao nga isyu.
