BR LA UNION – Saan pay a napagsaritaan idiay Malakanyang iti panangpa-ayab kenni Chinese Ambassador Huang Xillian.
Segun kenni Palace Press Officer Claire Castro, iti agdama ket awan pay ti bilin ni President Ferdinand Marcos Jr. a pagpalawagen iti Chinese official iti maipagarop a pannakibiang ti China tapno impluwensyaan ti eleksiyon ditoy pagilian.
Ngem mamati iti Palasyo a kasapolan ti naun-uneg nga imbestigasyon seknan daytoy, nangruna nu adda pakainaiganna iti seguridad ti pagilian.
Rimuar iti panagdengngeg idiay Senado a kinontrata dagiti opisyal ti Chinese embassy iti Infinitus Marketing Solutions a maipagarop a nagserbi a keyboard warriors ti China iti panagiwaras ti disinformation.
Segun iti National Security Council, adda indikasyon a maus-usar iti information operations tapno makibiang iti masungad nga eleksyon.
Nangipeksa ti pannaka-alarma iti Malakanyang nga adda agaraira a fake news peddlers ditoy pagilian.
