BR LA UNION – Binalakadan ni President Ferdinand Marcos Jr. dagiti motorista ken publiko a saan nga agbalin a kamote driver, nudiket paatiddogen ti pasensiya nu adda iti kalsada ken agman-maneho, agbalin a kalmado ken naannad iti panagsarita.
Inaramid ti residente iti waragawag na iti inruar a vlog ti Palasyo.
Kinuwestyon ti presidente nu apay a kasta metten iti taray ti panunot ken panag-ug-ugali dagiti Pilipino, na-siga, natured iti kalsada, ken awan ti disiplina.
Inladawan ti Presidente a kadagiti naglabas nga insidente ti road rage ditoy pagilian, nagpannuray ti ikkis, sinnubang, binnugkaw, tinnudo a nagbanag pay iti pinnaltog.
Impaganetget ti Presidente, iti panagmaneho ket maysa laeng a prebelihiyo.
Kinuna na a kasapolan a sumurot iti linteg-trapiko ti amin ken agbalin a disiplinado iti kalsada.
Impalagip ti Presidente a ti dua a minutos laeng a panag-pungtot nga agresulta ti kinaranggas, ket tungpal biag nga pagdusaan ken sayang ti oras nga imbes koma a para iti pamilya .
Innayon na a nasay-sayaat nu pagsaritaan ti problema a naurnos ken nakalma tapno saan nga agbanag iti naranggas nga insidente, a pagbabawyan iti udi.
