LA UNION – Naikkat iti puwesto ni Thailand Prime Minister Srettha Thavisin kalpasan nga inkeddeng ti korte a linabsingna ti konstitusyon.
Iti makunkuna a makapakigtot a desisyon ti korte ket lalo a nangilumlom ti pagarian iti nakiru a pulitika ti nasao a pagilian.
Iti naiyetnag a sentensiya ket makalawas kalpasan a winaswas ti isu met laeng a korte iti nalatak a Move Forward Party, a nangabak ti kaadwan a puwesto iti eleksiyon idi napan a tawen, ken napawilan dagiti lider ti nasao a partido a makipaset iti pulitika iti uneg ti10 a tawen.
Inkeddeng ti Constitutional Court idiay Bangkok ita nga aldaw, Agosto 14, a ni Srettha, maysa a real estate tycoon ket sinalungasingna iti ethics rules babaen ti panangdutokna iti abogado a nagserbi iti pagbaludan iti gabinete.
