BR LA UNION – Tingitingen ti House prosecution panel nu mabalin nga ibilang a hostile witness ni sigud a Department of Education (DepEd) Assistant Secretary ken spokesperson Atty. Michael Poa iti impeachment trial ni Vice President Sara Duterte.
Segun kenni House trial spokesperson Rep. Zia Alonto Adiong, napateg a testigo ni Poa iti isyu ti confidential funds ti DepEd idi sekretaryo pay ni Duterte.
Ni Poa ti maipagarop a maysa kadagiti opisyal a nangsungbat iti Audit Observation Memoranda (AOM) ti Commission on Audit (COA) seknan iti pannakausar ti confidential funds ti DepEd.
Kinuna ni Adiong a mabalin a makatulong iti testimonya ni Poa tapno mailawlawag nu kasatno a sinango ti DepEd dagiti audit findings ken dokumento seknan ti pondo.
Ingkumpara ni Adiong ni Poa kenni OVP Assistant Secretary Lemuel Ortonio, nga immuna nga indeklara ti prosekusyon kas hostile witness.
Nupay kasta, imbaga na a ti impeachment court ti addaan ti pinal a bileg nga agdesisyon nu kwalipikado ni Poa kas hostile witness.
Iti isyu ti DepEd confidential funds ket paset ti Article I ti impeachment complaint, a mangtalantan iti maipagarop a biddut a panagusar, panangwaldas, ken iregular a liquidation ti confidential funds iti OVP ken DepEd.
