LA UNION – Isagsaganan ti pulisya ti kaso kontra iti lima a suspek a natiliw babaen ti naisayangkat a buy-bust operation idiay syudad ti San Fernando, La Union.
Naammuan ti Bombo Radyo manipud iti San Fernando City Police Office, immuna a naaresto ti public school teacher a ni Arlan Fontanos, 43, ti Barangay Taberna, Bauang, La Union gapu iti maipagarup a panaglako daytoy iti tallo a sachet iti maatap a shabu idiay Barangay Pagudpud ti syudad.
Malaksid iti droga ket nakompiskar met manipud iti mannursuro ti P500 buy-bust money ken drug paraphernalia.
Iti naisayangkat a fallow-up operation ti pulisya, natiliw met babaen ti buy-bust operation dagiti agayan-ayat nga isuda Beverly Apilado, 41; ken Ovilby Gadia, 41, ti Barangay Poro ti syudad gapu iti maiupagarup a panaglako ti droga idiay Barangay 3.
Dua a sachet ti maatap a shabu, P1,000 buy-bust money ken drug paraphernalia ti nakompiska manipud iti agayan-ayat.
Iti panagtultuloy pay ti follow-up operation dagiti pannakabagi ti linteg, arestado met ti ag-live in nga isuda Allan Salcedo, 38; ken Racel Lopez, 23, ng Barangay Samara, Aringay, La Union gapu iti panaglako ti shabu.
Nakompiskar manipud iti dua ti siyam a sachet a nalaon iti maatap a shabu, P500 buy-bust money ken drug paraphernalia.
Sigun iti pulisya, maipagarup nga agaammo dagiti suspek a nagsasaruno a natiliw babaen ti anti-illegal drug operation idiay syudad.
Iti nasao nga operasyon ket karaman met dagiti kameng ti Philippine Drug Enforcement Agency.
