LA UNION – Disidido a mangidatag iti kaso ti maysa a detainee kontra iti pulis ken maysa a sibilyan a maipagarup a nangkabil kenkuana iti uneg ti police station idiay ili ti Bauang, La Union.
Iti pannakiuman ti Bombo Radyo ti nasao a nagbalin a Bauang Police Station a ni Jonathan Bambico, kinunana a tiniliw isuna dagiti pulis gapu iti maipagarup a panagrikyarda ti kasinsinna a ni Jefferson Feliciano idiay Barangay Parian Este ti nasao nga ili idi Domingo.
Iti uneg ti police station ket maipagarup a minalo isuna ni PO3 Roberto Ballesca babaen ti baseball bat kasaruno iti panangsipak kenkuana ti kasinsinna.
Maipagarup a saan met isuna a mangriribok iti uneg ti istasyon ti pulisya.
Sakbay a naruk-atan isuna, maipagarup nga adda ti maysa a pulis a naka-cilvian attire a nagpangta a mangpaltog kenkuana.
Kalpasan iti sumagmamano nga aldaw, maipagarup a nakarikna daytoy iti sakit ti bagi isu a nagsubli isuna iti nasao nga istasyon ti pulisya tapno agreklamo kasaruno iti panagpa-check-up ti ospital.
Agparparang iti medico legal a maipagarup a limmitem iti paset ti bagi ni Bambico gapu ti panangbugbog.
Naglibakan met ni Feliciano dagiti pammabasol kenkuana ti kasinsinna ken kinunana nga awan ti napasamak a panangdangran iti uneg ti police station.
Sinurot na laeng daytoy sadiay gapu ta isuna ti complainant.
Nagkedked met nga agpa-interview ni PO3 Ballesca malaksid laeng ti imbaga daytoy nga awan iti kinapudno dagiti alegasyon ni Bambico ken sungbatanna amin a maipagpabasol kenkuana.
Kabayatanna, impanamnama met ni C/Ins. Joel Lagto, hepe ti Bauang Police Station nga agbalin a patas daytoy iti panangisayangkat ti imbestigasyon tapno maammuan ti kinapudno kalpasan a maammuanna ti nasao a reklamo.
Tarigagay met ni Lagto nga itudo ni Bambico no sino iti ibagbagana a pulis a nagpangta kenkuana iti uneg ti istasyon.
Sigun met kenni S/Supt. Rodelio Samson, Provincial Director ti La Union Police Provincial Office (LUPPO), nga adda iti maiparbeng a pannusa kontra iti mairekreklamo a pulis no mapaneknekan dagiti alegasyon ti detainee.
Iti agdama, nagturongen ni Bambico idiay LUPPO tapno mangidatag iti reklamo kontra iti maipagarup a nangdangran kenkuana iti uneg ti police station. (Absalom Flores)
