LA UNION – Naisublin iti kostudiya iti Regional Mobile Force Batallion-1 (RMFB-1) ti naaresto a pulis kalpasan a maisampan ti kasona iti piskalya idiay ili ti Bauang, La Union.
Iti pannakiuman ti Bombo Radyo kenni C/Ins. Joel Lagto, hepe ti Bauang Police Station, kinunana a naidatagen iti prosecutor’s office ti kaso nga illegal possesion of firearm ken grave treath kontra iti suspek a a ni PO2 Jimmy Dacanay a nakadistino iti RMFB-1.
Sigun kenni Lagtog, makaammon iti ‘mother unit’ a naggappuan ti nasao a suspek a mangipataw iti disiplina kontra kenkuana gapu iti maipagarup a panagikot daytoy ti kolorum a paltog ken nairaman pay iti rimsua a riribok iti uneg ti maysa a video bar.
Immuna iti daytoy, nagturong iti balay pagraragsakan ti nasao a pulis ngem rimsua ti riribok iti baetanda dagiti sumagmamano a lallaki nga agiinom.
Maysa kadagiti lallaki sadiay ti nangagaw iti paltog ni Dacanay kasaruno iti panangipaima kadagiti nagresponde a pulis.
Naduktalan nga awanan met ti maiyanatop a dokumen iti paltog ti suspek isu nga inarestoda daytoy.
