LA UNION – Nagduduma nga anggulo iti kit-kitaen ita ti pulisya maipapan iti pammaltog ti riding in tandem suspect iti dua a lallaki, iti nagsina a lugar iti maikadwa a distrito ti La Union idi kalman.
Iti interview ti Bombo Radyo kenni C/Ins. Roy Villanueva, hepe ti Agoo Police Station, kinuna na a ti biktima a ni Archie Ventura ket akusado iti kaso a homicide gaputi panangpapatay iti maysa a barangay kagawad iti nasao met laeng a lugar.
Temporaryo met a nawaya-wayaan manipud pagbaludan ni Ventura kalpasan a nagpiyansa.
Segun kenni Villanueva, malaksid iti nasao a kaso ket siripen da pay iti sigud a pannakairaman iti riribok iti biktima kalpasan a makalasat iti pammaltog ditoy syudad ti San Fernando, La Union idi October 2017.
Naamwan pay manipud Agoo Police nga adda ti sigud a manggan-gandat iti biag ti biktima.
Kabayatanna, kinuna ti Tubao Police Station, nga addan iti kit-kitaen da nga anggulo ti pammaltog iti maipagarop a drug personality a ni Rocky Palaganas.
Kabilang iti im-imbestigaran ti pulisya ket ti maipapan iti pakainaigan daytoy iti iligal a droga wenno personal a biag daytoy.
Maipalagip nga idi agsapat kalman, nagsaruno a pinapatay iti a riding in tandem suspects dagiti biktima kadgaiti nadakamat nga ili.
