LA UNION – Tuloy ti nakatuding a hearing ti House Quad Committee inton bigat, November 27, 2024.
Segun kenni Rep. Robert Ace Barbers, iti overall chairperson ti Quad Committee, tutukan da ti isyu iti ilegal a droga ken Philippine Offshore Gaming Operators wenno POGO.
Kinuna ni Barbers a saan da pay laeng nga inimbitaran ni sigud a Pres. Rodrigo Duterte.
Ngem mangnamnama kunana iti Quad Committee a sumango iti hearing da: Davao City Rep. Paolo Duterte ken Atty. Manases Carpio, nga agpada a mairam-raman iti ilegal a droga.
Innayon pay ni Barbers, nga inimbitaran da manen ni dismissed Bamban, Tarlac Mayor Alice Guo, maipapan iti isyu ti kaadda dagiti espiya a Chinese ditoy pagilian.
Iti Quad Committee hearing inton bigat ti maika-12 a panagdengngeg.
Immunan a nakanselar iti hearing tapno maipamaysa dagiti kongresista iti panang-sungbat ti relief operations kalpasan ti nagsasaruno a bagyo.
