LA UNION – Agkidkiddaw iti dispensar ti Regional Police Community Relation Division (RPCRD) ti Police Regional Office-1 gapu iti panagwaras ti biddut nga impormasyon wenno fake news iti social media maipapan ti maipagarup a panagdakiwas dagiti kidnappers iti ubbing idiay probinsya ti La Union.
Iti pannakiuman ti Bombo Radyo kenni Supt. Patrick Joseph Allan, hepe ti RPCRD, kinunana a naggapu a mismo iti personal account ti tauhanna ti impormasyon maipapan iti maipagarup a kidnappers nga agdakdakiwas ken agtiltiliw kadagiti ubbing.
Impaganetget ni Supt. Allan, a saan a naggapu iti idadaulwanna nga opisina ti nadakamat nga impormasyon no di ket iti tauhanna a nag-share kadagiti official Facebook account iti dadduma pay a unit ti pulisya iti rehiyon.
Sigun iti opisyal, mabalin a kayat laeng iti tauhanna a mangted iti pakdaar kadagiti nagannak a bantayan dagiti annak, ngem saan daytoy nga umanamong iti panangiwaras ti biddut nga impormasyon a nangipaay iti panagdanag ti publiko.
Immuna iti daytoy, nagbalin a trending topic dagiti netizens ti post iti maysa a Criselda Soliven iti bukodna a Facebook account maipapan iti maipagarup nga agdakdakiwas a kidnappers nga agtiltiliw kadagiti ubbing babaen iti panagaramat ti agmaris iti gray a van idiay syudad ti San Fernando.
Ngem, kinuna ni C/Ins. John Guiagui, hepe ti San Fernando City Police, saan a validated ti nasao nga impormasyon ken awan iti napasamak wenno gandat a panagdukot kadagiti ubbing idiay syudad. (Absalom Flores)
