BR LA UNION – Umabot iti 3.17 billion US dollars ti cash remittances manipud kadagiti overseas Filipinos (OFWs) idi Oktubre 2025 ken agdagup ti 29.20 billion US dollar ti remittances manipud Enero agingga Oktubre ita a tawen.
Segun iti Bangko Sentral ng Pilipinas (BSP), agtaltalinaed nga Estados Unidos iti kangrunaan a paggapuan ti remittances, sumaruno ti Singapore ken Saudi Arabia.
Iti kapada a bulan, dagiti personal a remittances, agraman ti kuwarta a naipatulod kadagiti bangko, impormal a channel, ken remittances in kind, ket nairekord ti pakabuklan a 3.52 billion US dollars, ken 32.49 billion US dollars para iti sangapulo a bulan.
Dagiti remittances ket napateg a paset ti ekonomiya ti Pilipinas, a kadawyan a mangbukel iti 9–10% iti Gross Domestic Product (GDP).
Idi 2024, dimmanon iti 33.5 billion US dollars ti pakadagupan a remittances, ken manamnama a ngumato ita a tawen 2025 gapu iti agtultuloy a panagngato ti demand iti Filipino workers abroad.
Dakkel a paset ti remittances ket maus-usar iti household consumption, edukasyon, ken pabalay, a tumultulong iti panangidur-as ti lokal nga ekonomiya.
Segun iti BSP, makatulong ti agtultuloy a panagngato ti remittances a mangpatibker iti piso kontra dolyar ken mangkissay iti epekto ti global economic uncertainties.
