BR LA UNION – Awan ti malabsing a linteg ken awan ti mapaboran iti agbalin a resulta nu baliwan ti Senado iti voting threshold tapno ma-convict ni Vice President Sara Duterte, segun kenni House prosecutor ken Manila Rep. Joel Chua.
Kinuna ni Chua nga awan pay iti mapaspasamak a binnotosan iti impeachment case isunga adda pay gundaway a repaswen ti Senate impeachment court ti intuding a 16 a botos para iti conviction.
Immunan nga intuding ni Senate President ken Presiding Officer Francis Escudero iti 16-vote threshold, maibasar iti two-thirds ti 24 a senador.
Nagbalin nga isyu daytoy kalpasan a saan a makadar-ay ti sumagmamano a senator-judge gaputi detention, legal a problema wenno medical absence.
Imbaga ni Chua a nangipaay ti nagduduma nga opinyon dagiti retirado a mahistrado ti Supreme Court seknan nu kasatnu a rumbeng a bilangen iti two-thirds requirement.
Innayon na, iti panangala ti opinyon dagiti amicus curiae wenno eksperto iti linteg ket paset iti due diligence ti Senate impeachment court sakbay a mangaramid ti desisyon.
Manamnama nga ilanad ti prosecution ken defense ti bukod da a posisyon iti voting threshold iti oral arguments iti sumaruno a lawas.
Kalpasan na, agdesisyon ti impeachment court nu manu a botos iti kasapolan tapno ma-convict iti Vice President.
