BR LA UNION – Saan nga ipa-igid ni Mamamayang Liberal Partylist Rep. Leila De Lima iti posibilidad a tarigagay ti kampo ni VP Sara Duterte nga agserbi a ballaag kadagiti mammanday linteg ti Kamara De Representantes iti nasapa a deklarasyon na a tumaray kas presidente inton 2028.
Segun kenni De Lima, mabalin a kayat nga idanon ti bise presidente kadagiti mammanday linteg nga ‘ágtanang’ iti panagdesisyon iti impeachment complaint a naidatag kontra kenkuana, gaputa posible nga isuna ti sumaruno a presidente.
Kinuna na a saan a maliklikan a panunuten dagiti mammanday linteg iti posibilidad a maparigatan da nu ni VP Sara ti agbalin a presidente.
Nupay kasta, mamati ni Rep. De Lima a tumakder ti kaadwan a mammanday linteg inton matalantan ti impeachment complaint kontra iti bise presidente.
Innayon ni de Lima a saan a basta ma-impluwensiyaan dagiti miyembro ti Kamara, gapu laeng iti deklarasyon ti bise presidente.
Agpapada a naggapo iti pribado nga indibidwal dagiti naidatag nga impeachment complaint kontra iti bise presidente ken saan a rumbeng a baybay-an dagitoy wenno matagi-awan idiay kamara.
Iti agdama, uppat iti nakapenpen a reklamo kontra kenni VP Sara iti opisina ni House Speaker Faustino “Bojie” Dy III ken amin dagitoy ket nasken a tamingen dagiti mammanday linteg.
