BR LA UNION – Mamati ni Deputy Majority Leader ken Iloilo Rep. Janette Garin nasken nga usaren laengen iti oversight powers ti Kamara tapno pasungbaten dagiti opisyal ken kameng ti gobyerno a mangpar-parigat iti biag dagiti Filipino.
Inaramid ni Garin iti waragawag iti panagdengngeg ti Murang Pagkain Super Committee a naisayangkat idi kalman.
Segun iti Doctor solon, saan kadi pay a nabannog iti amin iti paulit ulit nga isyu ken sungbat dagiti maim-imbitaran a resource speakers nga agingga ita ket awan pay met iti solusyon nangruna iti mapas-pasaran a panagngato ti presyo ti bagas, ken dadduma pay a kangrunaan a taraon, kuryente ken dadduma pay.
Nangisayangkat ti panagdengngeg iti Quinta Committee idi kalman nga indaulwan ni Rep. Joey Salceda tapno talantanen dagiti isyu ti smuggling, hoarding ken panagngato ti presyo ti bagas ken taraon.
Nairanta ti panagdengngeg a mangbukel ti linteg a mangpapigsa iti food security ti pagilian.
