Kinuna ni Albay Representative Joey Salceda nga aniaman nga alegasion wenno isyu kontra iti pannakaited ti franchise iti ABS-CBN Corporation ket rumbeng a mapagsasaritaan iti congressional hearing.
Segun kenni Salceda, saan a kiniddaw ti network iti liderato ti Kamara a maikkan ida ti prangkisa.
Inbatad na nga inpila na ti nasao a gakat agsipud ta daitoy ti umno a desisyon nangruna ta isu ti co-author ti prangkisa ti ABS-CBN idi pay 2019.
Gagangay laeng kunana a saan isuna a miemro ti House Committee on Legislative Franchises, nupay nangited met isunan kadagiti opinion na iti maar-aramid a saritaan.
Inlawlawag pay ti kongresista a pinasingkedan ti Bureau of Internal Revenue iti 18th Congress nga awan ti pending tax deficiencies ti kompania.
Malaksid iti daytoy, makuna nga awan ti pending case iti Securities and Exchange Commission seknan iti foreign ownership idinto a naipaulog ti Public Service Act ken amendment iti Foreign Investment Act kalpasan a na-scrap ti franchise renewal.
Ad-adda pay nga intudo ni Salceda, babaen ti tulong dagiti nalawag a linteg nga adda umdas a mekanismo a mangrepaso ken mangkorehir iti isyu ti foreign ownership.
