Ti nabukel a House Murang Pagkain SuperCommittee wenno QuintaComm ket agbalinen a Murang Kuryente Supercommittee.
Segun kenni QuintaComm Overall Chairman ken Albay 2nd District Representative Joey Salceda, daytoy ket gapu ta ipamaysada da iti tawen 2025 ti panangbirok iti solusion iti nangato a singir ti koriente.
Kinuna ni Salceda, maitunos daytoy iti bilin ni House Speaker Ferdinand Martin Romualdez a mangipamaysa iti nakaro unay a presio ti koriente iti pagilian.
Dinakamat ni Salceda nga adalen pay ti komite dagiti natakuatan ti Energy Regulatory Commission (ERC) a ₱206-bilion a gastos nga awan ti autorisasion manipud 2016 agingga 2020 babaen ti National Grid Corporation of the Philippines (NGCP).
Kinuna pay ni Salceda a malaksid iti daytoy, imbilin ni Romualdez a maadal ti windfall taxes iti sobra a kita dagiti power sector participants a mabalin a mailatang para iti customer refunds ken Pantawid Kuryente.
