Nakatuding nga iruar ti Korte Suprema ti resulta ti 2024 online Bar examinations ita nga aldaw ti Biernes, Disiembre 13.
Maipaskil ti resulta ti eksaminasion iti main building courtyard iti Padre Faura Street sadiay Ermita, Manila ken mai-upload iti official website ken official social media accounts ti Korte Suprema.
Kasta met a maibinglay iti official website ken official communication channels ti korte dagiti livestream links ken QR codes ti resulta ti eksamen babaen ti YT ken FB.
Ipapakaammo ti korte iti publiko a dagiti laeng notices ken issuances nga impablaak ti official website-da ken dagiti verified a social media accounts ti rumbeng a maibilang a pudno ken umiso a datos gapu iti sensitive nature dagiti impormasion a mainaig iti resulta ti eksamen.
Kabayatanna, kalpasan a mairuar ti resulta ti eksamen, kinuna ni SC Associate Justice Mario V. Lopez, chairperson ti committee on Bar examinations ti SC a ti petsa ti oathtaking dagiti baro nga abogado ken ti panagpirma ti roll of attorneys inyanunsio idi agangay.
Maipalagip nga agdagup iti 10,483 examinees ti nag-eksamen iti umuna nga aldaw ti 3-day exam a naisayangkat idi Setiembre 8 ken simmaruno idi Setiembre 11 ken 15. Naangay ti eksaminasyon iti 13 a lokal a testing centers iti nadumaduma a lugar ditoy pagilian.
