(Update) LA UNION – Agtaltalinaed a burburtiya iti pulisya ti makagapu iti pammapatay ti maysa a retirado a pulis idiay Barangay Linmansangan, ili ti Binalonan, Pangasinan.
Nabigbig ti 62-anyos a biktima a ni retired SPO3 Pepito Calip.
Papatutukan ti Police Regional Office-1 iti Pangasinan Police Provincial Office ti panangisayangkat iti naun-uneg nga imbestigasyon tapno maipaayan iti hustisya ti biktima ken pagsungbaten iti linteg ti responsable iti napasamak a krimen.
Base ti imbestigasyon iti Binalonan Police, sakbay ti insidente ket maipagarup a kasar-sarita ni Calip ti kaaddubana iti ruar ti balayda idi nga adda immasideg a dua a saan pay a nabigbig a suspek kasaruno iti pammaltog agarup alas-6:35 ti bigat idi kalman.
Natay kabayatan a maag-agasan idiay ospital ti retirado a pulis gapu iti dua a tama ti bala iti tiyanna.
