Mabalin nga maipa-deport iti agingga ginasut a ribo nga undocumented Filipino workers idiay Estados Unidos iti sidong ti liderato ni Donald Trump ken mabalin nga agresulta iti permanente a pannakaipawil a panagsubli dan iti pagilian.
Gapo ti daitoy ket inawaganen ni Philippine Ambassador to the US Jose Manuel Romualdez dagiti undocumented Filipino workers sadiay a boluntaryo lattan a pumanaw wenno rugian nga iproseso dagiti dokumento da tapno maaddaan iti legal status sakbay pay iti panag-akem ni rump idiay White House inton umaruno a tawen.
Segun kenni Ambassador Romualdez, mapatta-patta nga adda iti 250,000 agingga 300,000 dagiti undocumented Filipinos idiay Estados Unidos.
Kinunana pay a possible nga itultuloy ni Trump ti plano na a mass deportation kadagiti illegal immigrant nga agkasapulan met iti adu a resources.
Iti agdama, arig na imposible paylaeng a ma-detect dagiti nasao nga illegal immigrants idiay Amerika agsipud ta agkakakonektar amin dagiti nadumaduma nga US departments manipud immigration agingga transportation security administration (TSA).
Posible pay a mangipasa ken agpatungpal iti nainget nga immigration laws ti Trump administration a suportado iti US Congress a kontrolado dagiti Republicans.
Kabayatanna, daitoy aldaw laeng ti Biyernes ket inyunay-unay ni Trump nga ipaypayso na iti sapata na idi kampanya para iti kadakkelan a mass deportation effort iti pakasaritaan ti Estados Unidos.
Iti laksid daitoy ket kinuna ni Ambassador Romualdez mabalin latta a mapawaywayan ti legal aid para kadagiti Pilipino tapno legal a makatrabaho sadiay Amerika.
Innayon na nga addaan ita ti agtultuloy a saritaan dagiti opisyal ti Guam tapno maipangato ti panag-hire kadagiti Filipino construction workers kadagiti military bases.
Segun iti Ambassador, kaykayat dagiti Amerikano dagiti mangmangged a Pilipino gapo iti kinalaing dagitoy maipapan kadagiti skilled works.
Mainaig met iti healthcare sector ket adda metten dagiti sumagmamano a health services companies nga immasideg kenkuana tapno mapangato ti bilang dagiti Filipino nurses a mahire.
Impalgak pay ti PH Ambassador ti kinapudno nga adda dagiti Filipino-Americans ti agtrabtrabaho iti business empire ni Trump partikular dagiti hotel ken golf clubs na. Innayon na a nangato ti panagkitkita ni Trump kadagiti Pilipino gapo iti kinalaing da iti trabaho.
