LA UNION – Nagu-ummong manen dagiti ribu a Korean protesters iti ruar ti National Assembly idiay Seoul, South Korea ita nga aldaw ti Sabado, Disyembre 14.
Daytoy ket iti tengnga ti binnotosan para iti maikadwa a gandat nga impeachment kenni South Korean President Yoon Suk Yeol kalpasan a mapaay iti immuna nga attempt idi napan a Sabado, Disyembre 7 kalpasan a nag-walk out ken i-boycott dagiti mammanday linteg manipud iti ruling party a People Power Party ti binnotosan.
Maibasar iti Seoul Police official, mapatta-patta a 200,000 a tattao ti nagu-ummong iti ruar ti parliament tapno suportaran ti pannaka-ikkat iti pwesto kenni Pres. Yoon.
Kabayatanna, idiay kabisera ti South Korea a Gwanghwamun Square, nagu-ummong iti mapatta-patta a 30,000 a tagasuporta ni President Yoon tapno ipakita ti suporta da iti Presidente ken agkan-kanta da ti patriotic songs bayat ti panangiwagay-way da iti bandera ti South Korea ken Amerika.
