LA UNION – Agtultuloy iti imbestigasyon ti pulisya maipapan ti pannakatay ti security guard iti warehouse idiay Barangay Acao, idiay ili ti Bauang, La Union itattay bigat.
Nabigbig ti biktima a ni Ricardo Sarmiento, residente iti ili ti Bimaley, Pangasinan.
Iti pannakiuman ti Bombo Radyo kenni Ofre Valdriz, maysa met laeng a security guard ti nasao a bodega, kinunana a nasapa isuna a simrek tapno sumublat kenni Sarmiento nga agbantay ti nasao a pasdek.
Agsidsiddaaw isuna gapu ta saan a sumangsungbat ti biktima idi a nagtuktok daytoy iti gate.
Nasarakanna laengen ni Sarmiento a kadardara ken nakadasay iti uneg ti comfort room isu a nagkiddaw daytoy ti arayat manipud kadagiti pulis.
Sigun kenni C/Ins. Meilanie Ordonio ti SOCO, base kadagiti marka ti dara ken mabalin nga inatake ken pinatay ti suspek ti biktima iti parking space sakbay daytoy a naiturong iti kasilyas.
Pinusitsitan pay ti suspek iti fire extinguisher ti bangkay ti bitkima tapno makalleban dagiti dadduma nga ebidensya ti panangpapatay.
Maipagarup pay nga innala ti suspek iti video tape (VTR) ti closed circuit televicsion (CCTV) ti warehouse.
Kabayatanna, posible a panagtakaw ti maysa a kitkitaen a makagapu ti pulisya a motibo ti saan pay a nabigbig a suspek a rummaut iti uneg ti bodega ken nangpapatay ti gwardiya.
Naammuan a ginnandat pay ti suspek a linukatan ti volt a naglaon iti kwarta ngem napaay daytoy.
Mapukpukaw met ti paltog ti gwardiya a posible nga intaray ti suspek. (Absalom Flores)
