Laksid iti agtultuloy na a panaglangan sadiay Senado, nakaipila latta ni Senador Ronald “Bato” dela Rosa kadagiti dua a singasing a linteg, pakairamanan ti panaglaban kontra foreign interference ditoy Pilipinas.
Pinermaan ni Dela Rosa iti Senate Bills 2079 ken 2080 idi Mayo 4, aldaw ti Lunes, kagiddan iti panagsubli ti sesyon kalpasan ti makabulan a recess.
Naisubmitir dagiti singasing babaen ti legislative staff na ken pormal a naibasa sadiay plenaryo idi Mayo 6.
Panggep ti Senate Bill 2080 wenno Counter Foreign Interference Act a dusaen ti aniaman a klase ti foreign interference, kasta met iti panangbukel ti konseho a nakapamaysa iti saritaan politika, ekonomiya, teknolohiya, edukasyon, linteg, ken seguridad.
Kabayatanna, iti met Senate Bill 2079 wenno National Police Clearance System Act ket tarigagay a papigsaen ti police clearance system babaen ti centralized database para kadagiti insidente ti krimen, arrest warrants, ken records dagiti naarestar, kasta met dagiti wanted nga indibidwal.
Agtultuloy a saan a masinunuo nu sadino ti ayan ni Dela Rosa kasta met iti saan na a panagdar-ay ti sesyon iti Senado manipud pay idi Nobyembre 2025.
Naglangan isuna gapo iti panangipaulog ti warrant of arrest ti International Criminal Court mainaig ti akem a kas Hepe ti Philippine National Police iti kontrobersyal a war on drugs ti sigud nga administrasyon.
Gapo kadaitoy ket sumango isuna ti ethics complaint gapo iti kabayag na nga awan iti Senado. Idi Lunes ket kiniddaw ti Senate ethics committee iti panagpalawag na seknan ti “no work, no pay” policy para kadagiti absentee senator.
