BR LA UNION – Inallokoy ti law professor ken law book author a ni Atty. Jennifer Arlene Reyes ni Sen. Francis “Chiz” Escudero nga agbalin nga istrikto kadagiti pada na a hurado iti agtultuloy nga impeachment trial ni Vice President Sara Duterte.
Segun iti beterano nga abogado, kasapolan nga agbalin a mas proactive iti trial presiding officer, ken usaren ti bileg ti impeachment court tapno masiguro a sumur-surot da iti allagaden ti korte.
Kas presiding judge, mabalin kunana nga usaren ni Escudero iti contempt power, bag-bagaan dagiti judge, ken patayen wenno ibilin nga iddepen iti mikropono.
Amin dagitoy kunana ket mabalin nga aramiden ni Escudero, maiyannurot iti itudtuding ti linteg, tapno masiguro a sumur-surot ken saan a malabsing dagiti allagaden wenno impeachment rules dagiti pada na a senator-judge.
Segun pay iti beterano nga abogado, nalawa ti sakopen ti bileg ken papel ti presiding officer iti maysa nga impeachment trial nga ipalubos ti linteg.
Gaputi dayta, adda bileg kunana iti siasinuman a presiding officer a disiplinaen iti dadduma a senator judge ken duktalen nu adda panaglabsing dagitoy iti allagaden ti korte.
Kinuna na a saan a maliklikan ti posible a panaglabes ti dadduma a senador iti karbengan da kas judge, isunga mabalin a sumrek wenno ag-“butt in” ni Sen. Escudero.
