Sakbay iti panagbobotos dagiti Senador seknan iti panakapaigid wenno panaka-archieve ti articles of impeachment maibusor kenni Bise Presidente Sara Duterte, kiniddaw ni Senador Rodante Marcoleta babaen iti maysa a mosyon iti panakaibasura ti impeachment case ti Bise.
Iti nagbalin a privilege speech na iti plenaryo ti Senado, impaganetget na a Korte Suprema iti nangibaga nga unconstitutional iti articles of impeachment.
Awan met ti kaes-eskan na no urayen pay iti motion for reconsideration nga impila ti Kamara iti articles of impeachment kontra kenni Duterte gaputa “immediately executory” iti desisyon ti Korte Suprema ken imposible nga adda ti maysa a mahistrado a mangibabawi iti nagbalin a desisyon na.
Impaganetget na nga iti “void ab initio” ken “unconstitutional” ket awanen ti aniaman a ridaw wenno tawa iti nakalukat para iti aniaman nga apela.
Kabayatanna, kinontra met ni Senate Minority Leader Tito Sotto iti mosyon ni Marcoleta gaputa addaan pay iti nakapenpen a motion for reconsideration iti Kamara.
Inpaganetget na a numanpay immediately executory iti desisyon ti Supreme Court, saan pay a pinal daytoy.
Rumbeng met a panunuten iti addang ti Senado sakbay nga agdesisyon.
Dinamag pay ni Sotto a kasano a maibasura iti impeachment case no awan met iti Senado iti kaso.
Maibasar iti panagsukisok ti manmanday-linteg, iti panangbaliktad ti desisyon ti Korte ket saan nga imposible.
Inrekomenda met ni Senadora Risa Hontiveros a rumbeng nga agtaripnong wenno agconvene iti Senado kas impeachment court sakbay nga agdesisyon nga ituloy wenno saan iti impeachment case kontra kenni Duterte.
Impaganetget pay ti minority senator a dagiti saritaan seknan ti impeachment case ket adda iti hurisdiksiyon ti Impeachment Court.#
