BR LA UNION – Inallokoy ni Senate Minority Leader Aquilino Pimentel III ni Pres. Ferdinand Marcos Jr. a mangdutok kadagiti miyembro ti gabinete nga awanan ti political ambition.
Daytoy ket tapno maipamaysa dagiti opisyales ti gabinete iti bukodda a trabaho ken tamingen ti aniaman a parikut a sangsanguen ti pagilian.
Segun kenni Pimentel, kasapulan ti presidente dagiti tattao a makapokus para iti balligi ti administrasionna.
Kinunana a kasapulan dagiti episyente ken epektibo nga opisyal a makatulong kadagiti Pilipino ken saan laeng nga agpokus iti bukodda nga ambision iti politika.
Impaganetget pay ti senador a dagiti ‘non-political personalities’ ket agbalin a mas objective ken scientific iti trabaho.
Idi kalman, May 22 ket nagsasaruno a nangidatag ti courtesy resignation dagiti miyembro ti gabinete ni President Marcos kas sungbat iti nagbalin a panawaganna.
Immunan a kinuna ti presidente iti maysa nga interbiyu a nasingpet unay isuna kadagiti opisial nga agtartrabaho iti babaenna, isu a kasla saanda a maragpat ti bukodda a puntiria.
Iti agdama, maur-uray pay laeng ti desision ni Pres. Marcos kadagiti amin a kameng ti gabinetena nga agsasaruno a nagisubmitir ti courtesy resignations idi kalman.
