Agsagsaganan ti Senado iti panagtultuloy ti imbestigasion ‘in aid of legislation’ maipapaan iti flood control scandal inton aldaw ti Lunes, Enero 19.
Maisayangkat ti hearing bayat a naka-break iti Kongreso, a sagudayen ti Motu Proprio Authority ti Senate Blue Ribbon Committee a kangrunaan a mangisayangkat kadagiti panagdengngeg iti naibutaktak a nasaknap a panagkunniber. Mangrugi iti panagdengngeg, eksakto ala-una ti malem.
Segun kenni Senate President Vicente Sotto III, nagkiddaw isunan dagiti sumagmamano nga opisial ken napateg a dokumento iti Department of Public Works and Highways (DPWH) babaen ti subpoena duces Tecum, a manamnama a makatulong iti naun-uneg nga imbestigasion.
Paset daytoy iti tarigagay ti Komite a mapagtitipon dagiti amin a file nga adda pakainaiganna iti flood control scandal, karaman ti kontrobersial a Cabral files.
Pinasingkedan pay ti committee chair a ni Senador Panfilo Lacson nga adda ti bukod a kopia ti komitena kadagiti nasao a files, ken iggem dan dayoy sakbay ti pinal a desision nga ilukat manen iti imbestigasion.
Immunan a pinasingkedan ni Sotto a pinermaan na dagiti 12 a subpoena para kadagiti dadakkel a personalidad a pakairamanan dagiti sumaganad:
- Sigud a DPWH Secretary Manuel Bonoan
- Sigud a Representative Zaldy Co
- Sigud a DepEd Undersecretary Trygve Olaivar
- Sigud a COA Commissioner Mario Lipana
- Sigud a DPWH Director Gerald Opulencia
- Sigud a DPWH Director Gerald Pacanan
- Maynard Ngu
- Orly Guteza
- John Paul Estrada
- Mark Teksay
- Arjay Domasig
- Carleen Yap-Villa
Malaksid kenni Co ken Bonoan nga agpada a kumpirmado nga adda iti sabali a pagilian, awan pay ti kumpirmasion no makadar-ay dagiti nadakamat a nagan.###
