Inaporobaranen ti Senado ti maikatlo ken maudi a panagbasa ti Senate Bill No. 1908 wenno ti Law Enforcement Body-worn Camera Act a mangibilbilin kadagiti law enforcement officers nga agsuot ti body cameras kadagiti opisyal nga operasyon da.
Kinuna ni Deputy Majority Leader Joseph Victor “JV” Ejercito a panggep ti gakat a maitandudo ti transparency ken accountability ti hanay dagiti otoridad a mangipaay ti proteksyon kadagiti sibilyan ken kameng ti gobierno.
Innayon na nga agserbi kas “impartial witnesses” dagiti body cameras iti panagdokumento kadagiti operasyon.
Babaen ti gakat ket agbalin ton a mandatoryo iti panagsuot kadagiti body-worn cameras ti amin nga operasyon ti Philippine National Police, National Bureau of Investigation, Bureau of Jail Management and Penology, ken ti Philippine Drug Enforcement Agency.
Intuding na met ti minimum technical standards dagiti mausar nga arawaten tapno masiguro ti kaledad dagiti recordings, partiklular ti 1080p Full HD resolution, built-in audio recording, date & time stamping, ken GPS capability.
Nainget met ti pannusa para kadagiti aglabsing a kas iti saan a panag-activate ti camera kadagiti operasyon, unauthorized access on recordings, negligent disclosure, tampering, destruction, ken dadduma pay a saan a rumbeng a pakausaran dagiti footage.
Iti kanito nga agbalin a linteg ket agbalinen a paset ti standard operating procedure dagiti law enforcement agencies ti panangusar ti body-worn cameras ti intero a Pilipinas.
