Nakasagana a dumepensa iti Senado para kenni Senador Ronald “Bato” dela Rosa no mangiruar ti arrest warrant iti International Criminal Court (ICC) kontra kenkuana ngem iti uneg laeng ti legal a proseso ken kusto a remedyo, segun kenni Senador Alan Peter Cayetano.
Ni dela Rosa ket maak-akusaran mainaig ti kampanya kontra droga ti administrasyon ni sigud a Presidente Rodrigo Duterte ket immunan nga imbagana nga agkiddaw isuna ti proteksion manpud kenni Senate President Francis “Chiz” Escudero tapno maliklikan iti posible a panangiyalis kenkuana dagiti otoridad no mangiruar ti warrant iti ICC.
Idi nadamag nu kabaelan ba a protektaran ti Senado ni dela Rosa uray pay naka-recess iti Kongreso, kenuna ni Cayetano, daitoy ket maisa a ““touchy subject”.
Impaganetget ni Cayetano, kasapulan nga maaddaan ti legal a mangtarabay manipud iti Korte Suprema no kaspangarigan dumanon iti kastoy a sitwasyon.
Inlawlawag na met iti konsepto ti sanctuary ket tapno laeng masiguro iti legal a kalintegan ti senador ken iti integridad ti Senado ken saan nga tapno agsirbi kas maisa a naisana nga entidad a saan rumbeng a pakibiyangan ti linteg.
Immunan a kenuna ni Escudero a saan isuna nga umanugot a sirreken dagiti otoridad iti Senado tapno arestoen ni Dela Rosa.
Daitoy ket no agkiddaw ti proteksyon ken agtalinaed iti Senado ni Dela Rosa no kaspangarigan ag-isyu iti International Crimal Court (ICC) ti arrest warrant kontra kenkuana.
Maibasar iti rules and practice, saan a palpalubusan ti Senado a maarestar iti siasinoman a miembro daitoy iti uneg ti institusyon, adda man sesyon iti Kongreso wenno awan.
Saan daitoy a nakabasar iti linteg no di ket maaw-awagan nga “institutional courtesy” no sadinno nagbalin a tradisyonen ti Senado ken paset ti rules a nabayag metten a masursurot.
