Mamati ni Senator Risa Hontiveros ti panagpigsa ita ti pudno nga oposisyon idiay Kongreso.
Daitoy ket kalpasan a makastrek ti Top 5 iti senatorial race da Bam Aquino ken Kiko Pangilinan bayat a nangidaulo met ti party-lists iti Akbayan ni Attorney Chel Diokno kasta met a nakastrek iti Mamamayang Liberal Partylist (ML) ni sigud a Senador Leila de Lima.
Segun kenni Hontiveros, saan laeng a simple nga “comeback” iti napasamak nu di ket pammaneknek a ti resulta ket pagsarmingan ti tarigagay ti tunggal Pilipino para iti gobierno nga addaan iti puso, prinsipyo, ken paninindigan.
Kinuna ni Hontiveros nga amin daitoy ket gapo iti talek ken panaggaraw ti umili a Pilipino kasta met ti pagkasapulan a maaddaan iti boses ti tao idiay Kongreso.
Impasigurado ti senadora a ti sumaruno a Kongreso ket itandudo ti panggep dagiti umili a panagngato ti suweldo, panagbaba ti presyo dagiti magagatang, abot-kamay nga edukasyon, ken panagpasungbat kadagiti abusado ti posisyon.
