BR LA UNION – Kinarit ni Senate Deputy Minority Leader Risa Hontiveros ni Presidente Ferdinand Marcos Jr. nga umuna nga agpaisidong iti lifestyle check iti tengnga ti kontrobersiya ken imbestigasyon seknan iti naanomalyaan a flood control projects.
Iti maysa a press conference, impaganetget ni Hontiveros a nu nagmandar ti Presidente ti lifestyle check kadagiti opisyal ti gobyerno, maiparbeng laeng a mangipakita ti ehemplo babaen ti panangisapubliko na ti Statement of Assets, Liabilities, and Net Worth (SALN).
Impaganetget ni Hontiveros a nu limitado laeng iti executive department ti imbilin a lifestyle check ni President Marcos, mabalin met nga agboluntaryo a makipaset iti Kongreso ken Hudikatura.
Segun kenkuana, adda bileg ti Senate President, House Speaker, ken Chief Justice ti Korte Suprema nga allokoyen dagiti senador, kongresista, ken mahistrado nga irwar iti publiko ti SALN ken ipa-amiris ti panagbiag dagitoy.
