Impalgak ni Senador Raffy Tulfo a binabalawna ti anakna a ni Quezon City 2nd District Representative Ralph Wendel Tulfo.
Kasaruno daytoy ti panaglabsing iti linteg ti trapiko ti anak na gapo iti panagdalyasat ti convoy na idiay EDSA Busway.
Kinuna ti senador a pinagungtan na ti anak na ket nagpadispensar met daitoy.
Karaman kadagiti na-ticketan nga SUV ket kameng metlaeng ti convoy ni Ralph Wendel Tulfo.
Inadmitir ti kongresista nga agdardaras ti isuna isu ket imbaon na ti driver a sumrek lattan iti EDSA Busway.
Impaganetget ti Senador a saan a nagulbod ti anak na kasta met a nagkiddaw iti dispensa ken saan na met a makitaan ti biddut ti insidente agsipud ta saan met a timmakas ni Ralph Wendel ken nangusar pay iti plate number 8.
Immunan a kinuna ti Special Action and Intelligence Committee for Transportation (SAICT) ti Department of Transportation nga adda naarestar da nga opisial ti gobierno idi Enero 23 ngem dida dinakamat no siasino.
Dagiti laeng mapalubosan a lumasat iti EDSA Busway ket dagiti autorisado a bus ti Land Transportation Franchising and Regulatory Board (LTFRB) agraman dagiti addaan iti special permit wenno prangkisa a lumasat:
Karaman dagiti on-duty nga ambulansia, bombero, PNP, service vehicles para kadagiti proyekto ti EDSA Busway kas kadagiti konstruksion, seguridad, janitorial ken maintenance;
Dagiti lugan a napili nga opisyales manipud iti presidente ti pagilian, bise presidente, presidente ti Senado, Speaker ti Kamara ken Chief Justice ti Korte Suprema.
Ti panaglabsing ket addaan iti multa a P5,000 iti first offense, P10,000 nga addaan iti makabulan a pannakasuspende iti driver’s license ken mandatory road safety seminar para iti second offense, third offense ket P20,000 a multa ken maysa a tawen a pannakasuspende ti lisensia, bayat a ti fouth offense ket P30,000 a multa ken rekomendasyon ti revocation ti lisensya manipud Land Transportation Office.
