BR LA UNION – Majority wenno 18 a senador ti pimmabor nga isubli idiay Kamara de Representantes iti impeachment case kontra kenni Vice President Sara Duterte.
Ngem dagus nga inlawlawag ni Senate President Chiz Escudero, a saan a kaipapanan daytoy nga ibasura ti kaso, ngem ketdi maysa a wagas tapno law-lawagan dagiti isyu nga inruar dagiti senator-judges seknan iti articles of impeachment, kas koma iti posible a panaglabsing iti one-year ban iti impeachment complaints kontra iti maysa nga impeachable officer.
Iti desisyon ti impeachment court ket kasaruno iti nagbalin a mosyon ni Senator Ronald “Bato” Dela Rosa nga i-dismiss iti impeachment case kontra kenni Vice President Duterte.
Kalpasan ti sumagmamano nga oras a debate, nag-move ni senator-judge Alan Peter Cayetano nga amendaran ti mosyon ni Dela Rosa, tapno maisubli idiay House of Representatives dagiti articles of impeachment a saan a dismiss wenno i-terminate ti kaso.
Iti nasao a mosyon ni Cayetano ket pinaboran iti 18 a senador, 5 iti kimmontra, ken zero abstention.
Kabilang dagiti pimmabor ket isuda: Senate President Chiz Escudero, Alan Peter Cayetano, Pia Cayetano, Bato dela Rosa, Bong Go, Loren Legarda, Raffy Tulfo, Bong Revilla, Robin Padilla, Imee Marcos, Cynthia Villar, Mark Villar, Joel Villanueva, JV Ejercito, Jinggoy Estrada, Francis Tolentino, Lito Lapid ken Migz Zubiri.
Dagiti kimmontra ket isuda Senate Minority Leader Koko Pimentel, Deputy Minority Leader Risa Hontiveros, Senator Nancy Binay, Senator Grace Poe, ken Senator Sherwin Gatchalian.
Gaputa inaprubaran ti kaadwan iti mosyon, awan ti mapasamak a presentasyon ti prosekusyon inton bigat, Hunyo 11.
Kabayatanna, nabilin iti Kamara ti maika-20 a Kongreso nga ipaka-ammo iti Senado a situtulok ken sisasagana a mangituloy iti impeachment complaint kontra iti Bise Presidente.
Nangiyisyu met latta ni Escudero kas presiding officer ti impeachment court, iti writ of summons kenni VP Sara tapno sumungbat iti uneg ti 10 nga aldaw.
