LA UNION – Sinuspendi ni Gov. “Rafy” Ortega-David ti serrek iti trabaho ti gobyerno ken iskuwela iti amin a tukad ti pagadalan iti intero a probinsiya ti La Union ita nga aldaw ti Biyernes, Nobyembre 8, 2024.
Daytoy ket kas panangipangruna iti kinatalged dagiti estudyante, mangisursuro ken mangmangged, gaputi pangta ti bagyo Marce.
Kabayatanna, agtalinaed met nga adda serrek dagiti frontliners a pakaibilangan dagiti mangipapaay ti medical ken social services, responsders, kangrunaanna dagiti mangbukbukel ti local disasters councils, tapno tumulong kadagiti umili iti tengnga ti panagduprak ti bagyo Marce.
Iti 5:00 latest weather bulletin ti PAGASA, iti northern portion ti La Union partikular idiay ili ti Sudipen, Bangar, Balaoan, Luna, Santol, ken Bacnotan ket nakaibayog iti Signal #2 idinto nga iti nabatbati a paset ti La Union ket nakapasidong met iti Signal#1.
Agtultuloy iti pakdaar ti PAGASA seknan iti delikado ken makadadael nga storm surge a dumanon ti agingga 5.0 m iti seaboard ti Ilocos Region.
Mainaig ti daytoy, adda dagiti residente nga agnanaed iti asideg ti kabaybayan ken dadduma pay a malay-layos a lugar, iti nasapa a nagturong iti evacuation sites iti masakopan da a lugar, para iti kinatalged dagitoy.
Idiay Barangay Mindoro, Bangar La Union, nasapa a nagturong idi kalman dagiti residente iti evacuation area gaputi peligro nga epekto ti bagyo Marce.
Nakaalerto ita dagiti kameng iti MDRRMO Bangar para iti epekto ti bagyo.
