BR LA UNION – Saan a direkta a maka-apektar iti paniempo ditoy daga ken iti kabaybayan ti Severe Tropical Storm “PODUL” iti sumaruno a lima nga aldaw.
Iti STS Podul ket agtaltalinaed iti ruar ti Philippine Area of Responsibility (PAR), naudi a nasaripatpatan iti kaadayu a 2,175 km daya ti Extreme Northern Luzon. Kabuy-buyog na ti angin nga agpigsa ti 95 km/h ken kapegges a dumanon iti 115 km/h. Nabuntog nga agtur-turong iti laud amianan-a-palaud a direksiyon.
Iti track forecast ti DOST-PAGASA, posible a sumrek ti STS PODUL iti PAR region iti baetan ti rabii ti Domingo inton bigat ken bigat ti Lunes, Agosto 11, 2025.
Apaman a sumrek iti teritoryo ti Pilipinas, maawagan a bagyo “GORIO”.
Namnamaen a pumigsa pay ti STS PODUL ken agbalin a Typhoon inton Domingo.
Saan pay a masinunuo nu sadino ti pagturongan ken kasatnu kapigsa ti PODUL inton Lunes agingga Miyerkoles, gaputa mabalin nga adda pagbaliwan iti track forecast ken intensity forecast kadagiti nasao nga aldaw.
Mabalakadan amin nga itultuloy nga i-monitor dagiti maiyetnag a pakaammo ken pakdaar maipapan iti Tropical Storm Podul.
