BR LA UNION – Nagballaag ti Philippine Institute of Volcanology and Seismology (PHIVOLCS) iti posibilidad a maulit ti panagbettak ti Bulkan Kanlaon idi kalman, Abril 8.
Segun kenni PHIVOLCS Director Teresito Bacolcol, mabalin a mapasarunwan pay iti short-lived explosive eruptions wenno napigpigsa pay.
Inladawan ni Bacolcol iti maysa a posible a panagbettak a “highly violent and powerful,” a mangparnuay ti napaspas a panagruar ti gas ken pressure nga addaan ti dapo, gas ken pyroclastic currents.
Saan nga ikkaten ni Bacolcol ti posibilidad a magmatic eruption.
Iti likudan daytoy, inlawlawag na a dagiti napalabas a panagbettak ti Kanlaon ket phreatic idinto a ti naudi a panangiruar ti lava iti Kanlaon ket idi 1902.
Gapu iti agtultuloy nga aktibidad ti bulkan, imbaga ni Bacolcol a posible a maingato iti alert level ti Kanlaon manipud Level 3 agingga Level 4, ken mapalawa iti danger zone iti 10 a kilometro.
Pinalagipan ti opisyal dagiti residente nga agnanaed asideg iti bulkan nga umadayo iti innem a kilometro a danger zone ken agdengngeg kadagiti balakad manipud iti local government units ken ahensya ti gobyerno.
