BR LA UNION – Kinumpirma ti Philippine Institute of Volcanology and Seismology (Phivolcs) a maibilang a “doublet earthquake” ti timmama a nagsaruno a napigsa a gingined idiay Davao Oriental idi Biyernes, Oktubre 10.
Inlawlawag ni Phivolcs Director Teresito Bacolcol a ti maikadua a ginggined nga agpigsa ti magnitude 6.8 a timmama iti offshore idiay Manay, Davao Oriental idi rabii ket saan nga aftershock ti immun-una a magnitude 7.4 a ginggined idi kalman iti dandani isu met laeng a lugar, agsipudta nagduma dagitoy ti seismic event.
Kinunana, mapasamak daytoy no dagiti fault wenno trenches ket manggubway ti stress a mang-trigger iti serye dagiti event.
Kinunana a saan a kas iti aftershock manipud iti main earthquake, ti gingined iti doublet ket independent events ngem mapapati a ma-triger dagitoy iti isu met laeng a fault wenno trench system a mangiruar ti accumulated stress.
Mapasamak ti kapada a pasamak no iti fault wenno trenches ti pakaigapuan ti stress a mang-trigger iti agsasaruno a napigsa a ginggined.
Kabayatanna, segun ken ni Dir. Bacolcol, saan a daytoy ti umuna a gundaway a napasamak.
Linagip ni Bacolcol iti ginggined idiay Hinatuan idi Disyembre 2, 2023 a timmama met laeng ti magnitude 7.4 a ginggined ken sinaruno ti magnitude 6.8 a ginggined iti simmaruno a dua nga aldaw.
Agtultuloy iti panang-analisar ti ahensiya iti parameters ti gingined tapno maamiris dagiti saguday ti dua a nagsina nga events ken maawatan a naimbag ti koneksiyon ti dua a timmama a gingined.
