BR LA UNION – Kinumpirma ti Palasyo ti Malakanyang a lima pay a nangangato nga opisyal ti Bureau of Customs (BOC) iti naikkat iti serbisyo kagiddan ti panagsukat ti liderato idi Lunes, Hunyo 30.
Pormal a nagsapata kenni Presidente Ferdinand Marcos Jr. ni sigud a National Disaster Risk Reduction and Management Council (NDRRMC) Executive Director Ariel Nepomuceno kas baro a Customs Commisioner kasukat ni sigud a Commissioner Bienvenido Rubio.
Segun kenni Palace Press Officer Atty. Claire Castro a malaksid kenni Rubio, inikkat pay ni President Ferdinand “Bongbong” Marcos Jr. iti sumnagmamano a Deputy Commissioners, collectors ken directors ngem saanen a nainaganan dagitoy.
Nagkedked ni Castro nga ibaga ti makagapo iti pannaka-ikkat ni Rubio ken dadduma pay iti puwesto, ngem imbagana a ti kayat ti Presidente ket agbalin a napudno dagiti opisyal ti gobyerno, partikular kontra iti smuggling ken agbalin a transparent iti koleksiyon.
