Pimmusay iti sigud a First Lady ti Nepal kalpasan nga inuram dagiti protesters iti pagtaengan na.
Nagramut iti rurod dagiti demonstrador kalpasan iti addang ti gobierno idi napalabas a lawas nga i-ban wenno iparit dagiti 26 a social media platforms, pakairamanan ti Facebook ken Youtube.
Ni Rajyalaxmi Chitrakar ket asawa ni sigud a Prime Minister Jhalanath Khanal.
Segun ti pamilyana, dagos a naiturong ni Chitrakar iti Kirtipur Burn Hospital ngem natay met laeng gapo kadagiti sinagabana a panakadundunor.
Malaksid iti pagtaengan ti sigud a first lady, pinuntirya met dagiti arsonist iti balay ti naglosolos a Prime Minister a ni KP Sharma Oli kalpasan a nagpaayab ti cross-party meeting tapno gibusan iti protesta.
Saan met a nagbalin nga epektibo iti panagikkat ni Oli tapno agsardeng dagiti protesta. Nagtalinaed dagiti rinibo a demonstrador kadagiti kalsada, hinarang da dagiti dalan, rarauten dagiti pasdek ti gobierno ken pupuuran da dagitoy, ken dagiti dadduma ket rarauten dagiti mismo a political leaders. Isunga naiyakar iti natalged a lugar dagiti sumagmamano a ministro babaen ti army helicopter.
Agarop 19 nga indibidual iti natay ken ado dagiti nadundunor gapo iti panakiranget da kadagiti otoridad ken puersa ti gobierno a mangar-aramat ti water cannons ken batons, kasta met iti rubber bullets.
Iti agdama a protesta ket nakamaysa iti social media ban nga imbabawin ti gobierno, ngem napalawa pay gapo iti nakaro unay a panakadismayada iti gobierno.###
