BR LA UNION – Arestado ti maysa a 35-anyos a sigud a supervisor ti maysa a gasolinaan idiay Manila gapu iti maipagarop a panagtakaw na ti aganay P57 million a birok ti kompanya.
Segun iti Manila Police District (MPD), naaresto ti akusado iti sango ti maysa a condominium idiay Parañaque City idi malem ti Martes, Marso 31.
Mapapati a pineke na iti deposit slip ti naglakwan ti gasolinaan tapno mailemmeng na ti aktwal a naglakwan.
Nangrugi nga agtrabaho ti akusado iti nasao a gasolinaan idi Marso 2024 iti sidong ti maysa a manpower agency.
Idi Marso 2025, nadiskubre ti agency iti ilegal nga aramid kalpasan a nasirip ti roving auditor dagiti deposit slip.
Segun iti Human Resource officer ti agency, saanen a nag-report iti opisina ti suspek ken nadlawan ti kellaat a panagbaknang ti akusado.
Nakaswan ti akusado iti 96 counts a qualified theft ken posible a manayunan pay.
Nagkedked ti suspek a mangipaay ti komento bayat a nakabalud iti custodial facility ti MPD.
