BR LA UNION – Ninaganan ni Presidente Ferdinand Marcos Jr. ni sigud a Supreme Court Justice Andres Reyes kas mangidaulo iti Independent Commission on Infrastructure (ICI), a mangimbestigar iti bilyon a kantidad nga anomalya iti flood control projects.
Inaramid ni President Marcos Jr. ti anunsiyo kabayatan ti panagbetla na ken press conference idiay Kalayaan Hall, Malacañan Palace ita a bigat, September 15, 2025
Ni Reyes ti mangidaulo iti komisyon, kadwa na dagiti immunan a naiyanunsiyo a miyembro, isuda sigud a Public Works and Highways Secretary Rogelio Singson, SGV Country Managing Partner Rossana Fajardo ken Baguio City Mayor Benjamin Magalong kas special adviser and investigator.
Nagserbi pay ni Reyes kas sigud a presiding judge iti Court of Appeals.
Napili ni Reyes a mangidaulo iti komisyon gapu iti napintas ken nadalus a record na nu maipapan iti panangsapol ti hustisiya, napudno ken patas.
Naminsan pay nga impaganetget ni Presidente Marcos, nga awan ti mapakawan, awan ti mapaboran ken awan ti matulongan a kabagyan, gayyem, am-ammo, wenno kapartido, iti imbestigasyon ti komisyon.
Segun iti Presidente, ti ICI ket naipaayan ti bileg a mangisayangkat ti panagdengngeg, i-subpoena dagiti testigo ken dokumento manipud kadagiti sanga ti gobyerno, ken mangala ti tao nga agbalin nga state witness.
