BR LA UNION – Kinumpirma ni Department of the Interior and Local Government (DILG) Secretary Jonvic Remulla, a sigud nga operator ti Philippine offshore gaming operators (POGO) ti adda iti likod ti napasamak a pannakadukot iti maysa a chinese nga estudyante idiay Taguig City.
Iti press briefing idiay Malacañang idi Miyerkules, Pebrero 26, imbaga ni Sec. Remulla a rimuar iti imbestigasyon ti pulisya nga adda pakainaigan kadagiti naiparikep a POGO iti sindikato a karaman iti insidente.
Kinuna na a buklen daytoy iti 22 a miyembro a pakairamanan dagiti uppat a chinese leaders ken 18 ti sigud a bodyguards.
Maibasar iti impormasyon ti DILG, iti nagannak ti ubing a biktima ket sigud a lisnesiyado nga operator ti POGO idinto a dagiti suspek ket notoryus a pogo operator manipud 2017 agingga 2022.
Iti agdama, saan pay a makasarita a nasayaat iti biktima gaputi trauma.
Ngem segun kenni Remulla, kas maibasar iti istorya ti biktima, aganay uppat nga oras a nagbiyahe dagitoy ken nagtalinaed da iti maysa a balay.
Kumidkiddaw dagiti suspek ti P20-million a ransom ngem idi saan a maited ti nagannak ti nasao a kantidad ket dita a pinuted da ti maysa a ramay ti ubing.
Maipalagip a naisalbar ti Philippine National Police (PNP) iti biktima, a maysa nga estudyante iti maysa nga international school idiay Taguig, kalpasan a madukot idi Pebrero 20.
