Impilan ni Senate President Francis “Chiz” Escudero iti singasing-linteg a mangiparparit kadagiti kabagyan ti opisyal ti gobyerno nga agbalin a supplier wenno contractor dagiti proyekto ti gobierno.
Kumpiyansa ni Escudero nga iti Senate Bill No. 783 ket ad-adda pay a mangpatibker iti salaknib ti pagilian kontra iti panagkunniber.
Karaman ditoy dagiti transaksiyon nga adda pakainaigan na iti supply, imprastruktura, joint ventures, ken public-private partnerships, malaksid laeng kadagiti kontrata nga maibilbilang a highly technical, proprietary, wenno confidential.
Paset pay iti singasing iti pakaibatugan ti sarita nga “opisyal ti gobyerno”, pakairamanan dagiti adda pagrebbengan na a bumukel ti polisiya, mangtaraken, wenno idaulwan – career man wenno non-career service – pakairamanan dagiti adda iti benneg ti military ken uniformed personnel.
Kabayatanna, bilbilinen ti proposed bill iti Government Procurement Policy Board, Department of the Interior and Local Government (DILG), Public-Private Partnership Center, ken Governance Commission for GOCCs a mangur-urnos dagiti patakaran ken alagaden para iti implementasyon iti las-ud ti 60 nga aldaw manipud iti bileg ti linteg.
Mangnamnama met iti Senate President a mairaman iti nasao a singasing-linteg iti Common Legislative Agenda ti 20th Congress babaen ti Legislative-Executive Development Advisory Council (LEDAC).#
