Mapatta-patta a ngumato ti agingga P4 ti kada kilowatt hour ti kanayunan a singir ti kuryente inton bulan ti Abril, segun ti Energy Regulatory Commission (ERC).
Inlawlawag ni ERC chair ken CEO Francis Saturnino Juan nga iti insayangkat nga simulation ti Independent Electricity Market Operator of the Philippines (IEMOP) a naibasar ti trend ti presyo iti langis ket rimuar ti potensyal a panagngato ti P2 agingga P4 per kWh.
Malaksid iti epekto ti pangraut kadagiti oil-producing region, maikonsidera pay ti nangatngato a pagkasapulan ti panawen ti kalgaw ken ti posible nga outages kadagiti planta iti kuryente.
Ipakpakita pay ti simulation dagiti manamnama a panagngato ti presyo ti thermal generator kas paset ti cost recovery.
Sakbayna ket imbatad ni Energy Secretary Sharon Garin a mabalin nga agresulta iti geopolitical tension ti agingga 16% a panagngato dagiti electricity rates.
